Manifiestu #AsturianRevolution

¿QUÉ YE #ASTURIANREVOLUTION?

#asturianrevolution ye una rempuesta social, económica, nacional, democrática, pacífica, que garra los derechos humanos como bandera, a problemes comunes que’l sistema políticu nun solo nun quier resolver, sinón que, por acción, aquiescencia y omisión, causa.

#asturianrevolution ye un movimientu onde cabe tol mundu, ensin sigles de partíos nin sindicatos, ensin pretensión d’apropialu. Nun mos sentimos representaxs dafechu pol sistema partidista y político-económicu d’anguaño. Queremos puxar pol debate políticu direutu y dende la base, dende’l pueblu, axuntando voces individuales.

#asturianrevolution axunta a los movimientos sociales d’Asturies. Porque enxamás vamos ser un pueblu realmente llibre si continuamos sometíos a les condiciones sociales, económiques y polítiques actuales. Porque la espresión democrática y soberana de la sociedá asturiana siempre tien de ser respetada, ya que la llexitimidá ta penriba de la llegalidá. El sistema políticu d’anguaño recorta los nuestros derechos políticos de la mesma manera que los sociales.


¿QUÉ DENUNCIA #ASTURIANREVOLUTION?

#asturianrevolution DENUNCIA’l sistema políticu actual, que penriba de dereches o izquierdes ta sometíu a unos mercaos y a un sistema financieru que naide escoyó, qu’imponen un sistema neolliberal onde se trata a les persones como simple mercancía.

#asturianrevolution DENUNCIA la corrupción del sistema políticu actual en tolos sos ámbitos, un sistema que, afaláu por empresarios inmorales y políticos ensin ética, representa un espoliu escomanáu de recursos pa la sociedá. Denuncia la derrota de los grandes partidos políticos énte los poderes económicos mundiales y la so traición a la voluntá política de la sociedá asturiana. Si nun votamos a los “mercaos”, ¿por qué gobiernen ellos?

#asturianrevolution DENUNCIA les carencies democrátiques del esquema políticu de la transición, onde la dixebra de poderes ye una cortina de fumu y too queda, en realidá, nuna partitocracia bipartidista.

#asturianrevolution DENUNCIA a les formaciones polítiques qu’envizquen l’odiu ente les naciones, comunidaes y pueblos, negándo-yos derechos civiles básicos de representatividá política y exerciciu de la so llibertá como ciudadanos. Entendemos que la democracia nun-y tien que dar mieu a naide y que conceutos como l’autoxestión, l’autodetermín o la oficialidá de la llingua asturiana son derechos inalienables del pueblu asturianu, de mou qu’una verdadera democracia va aceptalos con normalidá.

#asturianrevolution DENUNCIA la falta d’un futuru pa mozos y moces. La xeneración meyor formada de la historia d’Asturies ta condenada a sufrir un 45% de paru mozu y a la emigración forciada. Colos mensaxes políticos contradictorios y contraproducentes de los últimos venti años, la xente mozo d’Asturies vive una de les dómines más gafes de la so vida, con mieu a que’l futuru namás pueda ser peor.

#asturianrevolution DENUNCIA l’espoliu del patrimoniu natural ya históricu d’Asturies, afaláu por polítiques industriales y económiques que prioricen el beneficiu multimillonariu d’una élite penriba del respetu a la nuestra naturaleza y cultura, penriba de la salú y el bientar de los y les asturianes.

#asturianrevolution DENUNCIA’l desaniciu del sistema educativu públicu asturianu, por mor de modelos mercantilistes como’l Plan Boloña, diseñaos pa baxar el nivel de la formación al tiempu que se xube’l so costu, faciendo que namás una élite seya a formase con calidá y convirtiendo a lxs estudiantes en clientes y mercancíes como entamu pa la sociedá acrítica, obediente y consumista que quier construyir el poder político-económicu.

¿QUÉ YE IMPRESCINDIBLE PA #ASTURIANREVOLUTION?

#asturianrevolution ESIXE la parada de los recortes presupuestarios a los servicios públicos. La sociedá asturiana merez y esixe que los recursos públicos caltengan un sistema sanitariu y educativu públicu y de calidá como prioridá primera del país.

#asturianrevolution ESIXE la retirada inmediata de la reforma llaboral, la garantía de les pensiones y un sistema de xubilación xustu pa tolxs ciudadanxs.

#asturianrevolution ESIXE la soberanía fiscal d’Asturies, onde la solidariedá sea proporcional, equitativa y xusta, respetando’l derechu de la sociedá asturiana a xestionar los sos recursos económicos ensin depender d’intereses ayenos. La mala xestión de los recursos propios y la situación de dependencia esterior a la que nos conducen les polítiques actuales manca y fai insostenible la capacidá de sobrevivencia del nuestru país.

#asturianrevolution ESIXE tresparencia a los partíos políticos y cargos públicos, qu’habrán d’asoleyar y xustificar el so patrimoniu, la espulsión d’imputaos por corrupción o cualquier delitu de les llistes eleutorales y de los cargos de llibre designación qu’ocupen na alministración, la responsabilidá económica personal y familiar de los sos actos.

#asturianrevolution ESIXE’l control independiente y social de les aiciones polítiques respeuto a los fondos públicos, el patrimoniu de l’alministración y l’aición urbanística. Esiximos instituciones eficaces escontra’l fraude la corrupción na alministración.

#asturianrevolution ESIXE cambios nes lleis eleutorales qu’aseguren la pluralidá, la proporcionalidá, la igualdá y la representación unitaria de lxs asturianxs teniendo en cuenta factores demográficos y territoriales. Esto implica: la búsqueda de sistemes electorales mestos onde se tengan en cuenta les característiques demográfiques y xeográfiques de los territorios. Asina como sistemes de votación abierta ente candidatures eleutorales que primen la participación ciudadana frente a los aparatos de los partíos.

#asturianrevolution ESIXE el respetu máximu a les decisiones democrátiques del pueblu asturianu, arriendes del cumplimientu de les cartes internacionales de Derechos Humanos y Derechos Civiles.

¿QUÉ PROPÓN #ASTURIANREVOLUTION A LA SOCIEDÁ?

#asturianrevolution PROPÓN que caún y cauna de nós reflexone individualmente y coleutivamente sobre los actos de votar, de participar nuna sociedá democrática y de collaborar col teatru políticu de los grandes partíos. Propón una reflexón eleutoral organizada, cívica, consciente ya intelixente sobre les alternatives. En definitiva: pasar de la quexa a l’aición coleutiva.

#asturianrevolution PROPÓN a la ciudadanía una reflexón xeneral y un exerciciu de conciencia. El debate en tolos nuestros ámbitos (collacios, familia, trabayu, institutu, universidá, asociación, peña, club, sindicatu, partíu, etc.) tien de trescender los tabúes sobre los grandes problemes de les persones. Hai que debatilos ensin mieu.

#asturianrevolution PROPÓN que los partíos y los sindicatos entamen un debate fonderu sobre la so representatividá real, sobre la so sumisión al neolliberalismu, sobre’l sistema económicu, políticu y social, sobre quién y cómo se controla’l fraude y la corrupción. En definitiva, sobre qué futuru nos proponen, si ye que daveres proponen ún.

#asturianrevolution PROPÓN dar el llombu a tolos actores y protagonistes de la situación que vivimos, porque en realidá nun s’esmuelen un res por nós. Toxs, xuntxs, hemos construyir una alternativa que seya a dexalos al marxe, a curtiu, a mediu y a llargu plazu.

Descargar PDF Manifiestu #AsturianRevolution